Banner, solskin og stands med snop var noko av dei om lag 2.500 frammøtte elevane frå vidaregåande skular i heile sørfylket blei ønskte velkomen med på UiS tysdag.

Etter ein peptalk frå rektor Klaus Mohn var det fritt fram for elevane å utforska kva universitetet hadde å tilby dei.

Mens nokon allereie har klart føre seg kva dei skal til neste år, er det framleis nokon som vil bruka heile tenketida fullt ut før dei tek eit endeleg val som står til 20. april.

• Følg Byas på Instagram!

– Eg har ikkje søkt enno, nei.

Det seier Ida Eline Melbye som var på veg nedover mot Kjell Arholms Hus, der mellom anna sjukepleiarstudentane held til.

Ved sida av henne står Evelyn Hustad. Ho har allereie bestemt seg for kva ho skal, og har alt fylt ut og levert inn søknaden sin.

– Eg har valt studium på bakgrunn av interesser. Derfor har eg søkt psykologi. Det er kjekkaste faget eg har på skulen, så det er det eg vil gå vidare med.

Aftenbladet: VGS-søkartala er klare: Dette faget har aldri vore meir populært

Mange moglegheiter

Men elevane er klare over at det er mange vegar dei kan gå når dei fullfører vidaregåande i juni. Ikkje alle har tenkt å hoppa rett inn i tre nye år med skulegang.

– Eg har bestemt meg for å ta eit friår og reisa rundt i verda, seier Isabel Sorena Sæland Khorasani.

På lengre sikt har ho tenkt å gå ei linje som samsvarar med interessene hennar.

– Eg vil gå noko innanfor helsesektoren fordi eg likar å hjelpa andre.

Tuva Eide Knudsen har òg tenkt å ta eit friår, men har landa på at ho vil studera jus når tida er inne for det.

Emma Snilsberg skal inn i militæret etter vidaregåande. Ho veit ikkje kva ho skal studera heilt enno, men er klar over at ein kan ta utdanning mens ein er i Forsvaret.

Endeleg tilbake

Dei to siste åra har det berre vore digitale møte mellom vgs-elevar og studentar.

Under tysdagens opne dag var det om lag 100 arrangement innan 14 ulike studieretningar.

For å unngå overfylte lokale blei velkomsttalane delte i to. Rektor Klaus Mohn talte i auditoriet i Elise Ottesen Jensens hus og tykte det var gledeleg å kunna ønska så mange elevar velkomne på universitetsområdet.

– I dag har elevane fått eit skuleavbrekk og fått informasjon om alle studia me kan tilby dei her. Så får dei tid til å prosessera alt, så håpar me at me ser dei igjen i august.

Men å velja mellom alle desse studia er inga enkel oppgåve. Oppfordringa frå universitetsrektoren er å lytta til seg sjølv.

– Det må vera at elevane ikkje må la seg styra av tradisjonar, men av interesse og talent.